Elai Alai dantza taldeko haurrek Oñatiko 54. Haurren Egunean parte hartu dute 

Gernikako dantzari txikiak irailaren 20an ospatutako jai jendetsuko gonbidatu nagusietako bat izan dira, oñatiarrekin batera herriko kaleak dantzaz eta alaitasunez betez.

OÑATI / GERNIKA.– Giro bikainean eta ehunka herritarren babesarekin, Oñatik 54. Haurren Eguna ospatu du jada. Aurtengo edizio berezi honetan, protagonista nagusien artean Gernikako Elai Alai dantza taldeko haurrak egon dira.

Dantzari txiki gernikarrak Oñatira bidaiatu dute gonbidatu gisa, bertako Oñatz dantza taldearekin eta Euskal Herriko beste txoko batzuetatik etorritako haurrekin batera egun osoko jaiaz gozatzeko. Goizeko harrera ekitalditik hasi eta arratsaldeko Alarde nagusira arte, Elai Alaiko kideek euren trebezia eta indarra erakutsi dituzte herriko kaleetan zehar egindako ekitaldi eta kalejiretan.

Eguraldi eguzkitsua lagun, gernikarrek esperientzia paregabea bizi izan dute Oñatin, tradizioa partekatuz eta dantza taldeen arteko loturak sendotuz.